Á 212. fundi hreppsnefndar var málinu vísað til skipulags- og byggingarnefndar til upplýsingar. Tölvupóstur barst frá Hlín Benediktsdóttur hjá Landsneti um að framkvæmdaráætlun kerfisáætlunar 25-34 hefði breyst. Breytingar voru gerðar á tímalínu Holtavörðuheiðarlínu 1 og hún færð fyrir aftan Holtavörðuheiðarlínu 3. Samkvæmt framkvæmdaráætlun munu framkvæmdir hefjast í lok árs 2028 eða byrjun árs 2029.
Breytingin er tilkomin vegna samræmingar við aðrar línuframkvæmdir á svæðinu, þ.e. Blöndulínu 3 og Holtavörðuheiðarlínu 3. Ekki er talið æskilegt að framkvæmdir við fleiri en eina 220 kV loftlínu fari fram samtímis, meðal annars vegna:
- Nýta fjárfestingargetu flutningsfyrirtækisins með hagkvæmari hætti
- Vegna óvissu um aðgang að verktökum/mannafla
- Til að milda áhrif á flutningsgjaldskrá
Jafnframt hefur verið tekin ákvörðun um að víxla tímaröð Holtavörðuheiðarlínu 1 og 3 til að ná fram þeim kerfislega ávinningi sem felst í spennusetningu Holtavörðuheiðarlínu 3.
Ekki verði þó slegið slöku við í undirbúningi Holtavörðuheiðarlínu 1. Stefnt er á að samningaviðræður við landeigendur hefjist núna í haust og unnið verður með sveitarfélögum að skipulags- og öðrum leyfismálum. Fari svo að undirbúningsferlið gangi betur en áætlanir gera ráð fyrir þá verður staðan endurskoðuð. Uppfærð framkvæmdaáætlun kerfisáætlunar 25-34 var send til Raforkueftirlitsins 1. sept. sl.

Lagt fram erindi vegna áhrifa 16. gr. laga nr. 55/1992, en hún verndar sjóðinn og gætir hagsmuna heildarinnar gagnvart því að bótasjóðnum sé almennt ekki ráðstafað til að greiða bætur þar sem hús eða annað mannvirki, sem skemmist, er reist á stað sem almennt var vitað fyrir fram að var hættulegur með tilliti til náttúruhamfara, t.d. ef mannvirki á sama stað hefur oftar en einu sinni orðið fyrir sams konar tjóni. NTÍ undirstrikar að skipulag byggðar og leyfisveitingar á þekktum hættusvæðum eru á ábyrgð viðkomandi skipulagsyfirvalda og þeirra aðila sem að byggja og reka mannvirki á slíkum stöðum. Kaupendur húseigna geta ekki gengið út frá því sem vísu að tjónabætur verði greiddar þegar þeir kaupa eignir sem byggðar eru á svæðum þar sem hættan er fyrir fram þekkt eða endurtekin. Ábyrgð skipulagsyfirvalda er því mikil og vill stjórn NTÍ vekja sérstaka athygli sveitarfélaga á henni.

Byggingarleyfisumsókn var grenndarkynnt sbr. 44. gr. skipulagslaga nr. 123/2010 m.s.br. þann 11.9.2025 til 9.10.2025 þar sem ekkert deiliskipulag er í gildi af umræddri lóð. Grenndarkynning fór fram í skipulagsgátt sjá á eftirfarandi slóð: https://skipulagsgatt.is/issues/2025/1090 . Ein umsögn barst á kynningartíma frá Minjastofnun Íslands.

Óskað er eftir heimild til að stækka frístundarhúsið um 22,2 m2, alls verður húsið eftir stækkun, 68,3 m2. Lóðin er 2500 fm að stærð. Byggingarmagn er í samræmi við Aðalskipulag sveitarfélagsins. Ekkert deiliskipulag er fyrir svæðið.

Skipulagsdagurinn er árleg ráðstefna Skipulagsstofnunar og Sambands íslenskra sveitarfélaga um skipulagsmál. Ráðstefnan verður haldinn 23. október 2025.

Undanþága liggur fyrir hjá félags- og húsnæðismálaráðherra frá ákvæði gr. 5.3.2.5 d-lið skipulagsreglugerðar nr. 90/2013 þar sem kveðið er á um að ekki skuli staðsetja íbúðir eða frístundahús nær stofn- og tengivegum en 100 m. Fjarlægð byggingarreits frá Skorradalsvegi (508) verður 90 m. Auglýsing um samþykkt hreppsnefndar þann 16.7.2025 um breytingar deiliskipulags mun birtast í B-deild Stjórnartíðinda þann 20. okt. nk. og öðlast þá deiliskipulagsbreytingin gildi.

Embætti skipulagsfulltrúa veitti Landi og skógi framkvæmdaleyfi þann 19.9. 2024 sem fól í sér meðal annars að lagfæra hlíðar Dragafells þar sem ruddur var slóði í óleyfi.

Ályktun aðalfundar Skógræktarfélags Íslands lögð fram og kynnt.

Orka náttúrunnar ohf. og Orkuveita Reykjavíkur (Orkuveitan) hefur óskað eftir því að Úrskurðarnefnd umhverfis- og auðlindamála (ÚUA) veiti álit sitt á því hvort fyrirhugaðar framkvæmdir við tímabundna styrkingu stíflumannvirkja við Andakílsárvirkjun séu leyfisskyldar samkvæmt lögum um mannvirki nr. 160/2010 eða skipulagslögum nr. 123/2010. Nánar tiltekið er þess óskað að nefndin úrskurði, með vísan til 4. mgr. 9. gr. laga nr. 160/2010 um mannvirki og 8. mgr. 13. gr. skipulagslaga nr. 123/2010, hvort lög áskilji að byggingarleyfi eða framkvæmdaleyfi þurfi að liggja fyrir áður en til framkvæmdanna kemur. Sveitarfélagið hefur frest til 24. október nk. til að koma á framfæri athugasemdum sínum.